Goenkalek bete ditu hamar urte eta, azken urtean ere, kontatu dira hamaika istorio. Leonorek nahikoa gorabehera bizi izan ditu: Yamila lehengusinaren heriotza, haren senarra zenaren ordezko Arralden agertu zen gizatxar maltzurra jasan beharra, Koldorekin ezkondu nahi eta ezin, amnesia malapartatua, Mikelen itzulerak eragindako maitasun krisia... Maria Luisarekin adiskidetuta ere ikusi dugu nahiz eta azkenean haserre bukatu... Sorpresa galanta hartu zuen ama Arralden agertu zenean; handiagoa hartu du, baina, han geratuko dela esan dionean... Hamaika gorabehera, behera eta gora.

Beheak jota ibili da ere María Luisa, batez ere, Estefaniak hala aginduta eroetxean gatibu eduki zutenean. Lortu zuen azkenean handik ateratzea, halere, gero ez zuen lortu Estefaniak egindako okerrak ordaintzea. Hamaika buruhauste jasan dute Txapas eta Lutxik: Diego haurra ezagutu dute eta geroztik bizia erabat aldatu zaie, dagoeneko familian bizi dira eta halaxe nahiko dute aurrerantzean bizi, jo ta su ari dira bidea egiten kosta ahala kosta. Bienbitartean, Txapas sinistuta ibili zen Lama baten errenkarnazioa zela, bai bera eta bai Lutxi telebistako izar bihurtu aurretik izan zen hori. Eusebiok eta Margarik heriotzari egin diote aurre, halamoduz, elkar asko maite dutela erakutsi ziguten, maitasunak baduela tokia bihotz nekatuetan. Gazteek ere mila abentura bizi izan dute: Eusebio autoarekin harrapatu, pisukideen elkarbizitza pisua... Tomax ibili da okerren, burua non zuen ere ez zekiela. Ez da harritzekoa, umea izan du, lanetik kaleratu dute... Mila ere gazte artean ibili da, Andonirekin harremana hautsi eta handik gutxira Nelson kubatarrak lortu zuen haren bihotza samurtzea.

Aspaldiko lagunak agertu dira aurten Goenkalen: Isaias bat, berriro ere gaiztakeriak egiteko prest; Guti, bihotza gordin eta buruan su; Elene, arazo sortzaile peto petoa; Hortentsi, beti bezain sutsu eta emankor; Eta Estefania, bazterrak nahasten beti, muturrean gustora... berak eman dio amaiera urteari, tiro egin diote eta jausi da ziplo lurrera, ikusi du odolak nola zikintzen zion arropa.

Datorren urtean argituko dira argitu beharrekoak, okertu zuzen daudenak eta zuzendu nahasian dagoena.

Atal honetan Goenkaleko pertsonaiekin momentu atseginak igaro ditzazun joko dibertigarriak ipintzen joango gara poliki poliki.

Joko taula batean Goenkaleko pertsonaien irudiak
agertuko zaizkizu. Irudi bakoitza bere bikiarekin aukeratu eta fitxak desagertzen joango zaizkizu. Jokoaren helburua joko taula garbi uztea da. Kontuz baina! Fitxa guztiak ezin izango dituzu zure gustura mugitu, askotan nahi
dituzunaren ingurukoak desagertarazi beharko dituzu aurrera jarraitzeko!